Hanyoyin Rayuwa | Falaloli Bakwai na Yin Shiru

Kamfanin Dillancin Labaran Hauza | A cikin bayaninsa kan muhimmancin yin shiru, Sarkin Muminai Imam Ali (A.S) ya ce:

«بِکثْرَةِ الصَّمْتِ تَکونُ الْهَیبَةُ»

Ma’ana: “Yawan yin shiru yana haifar da mutunci da girma.”(1)

Muhimmancin yin shiru

An yi magana da yawa kan muhimmancin yin shiru, kuma akwai hadisai masu yawa da suka zo kan wannan batu.

An ruwaito daga Imam Ja’afar Sadik (A.S) wata magana mai kunshe da bayanai masu yawa game da falalar yin shiru.

Imam Sadik (A.S) ya bayyana cewa:

“Shiru shi ne salon mutanen da suke bincike da neman sanin gaskiyar abubuwan da suka faru a baya. Haka kuma shi ne ginshikin ayyukan mutanen da suka yi nazari kan halin mutanen da suka gabata, suka kuma fahimci sauye-sauyen zamani. Wannan nazari ne ya zama tushen yin shiru da kame harshe.

Yardar Allah tana cikin shiru. Haka kuma shiru yana rage wa mutum nauyin hisabi, yana kare shi daga kura-kurai da zamewa cikin kuskure.

Allah Ya sanya shiru ya zama sutura ga jahili, kuma ya zama ado ga masani.

Shiru yana taimakawa wajen nisantar son zuciya, yana horar da rai, yana sa ibada ta kasance mai daɗi, kuma yana kawar da taurin zuciya.

Haka kuma shiru yana haifar da kamun kai, mutunci da basira.

Saboda haka, ka kame harshenka daga furta kalaman da ba dole ba ne ka faɗe su, musamman idan ba ka sami wanda ya dace ka yi magana da shi domin Allah da kuma a tafarkin Allah ba(2).” 

Yin shiru yana kare mutum daga kura-kurai

An kuma ruwaito cewa wani daga cikin Sahabban Manzon Allah (S.A.W.A) ya kasance yana sanya ƙaramin dutse a bakinsa. Idan ya yi niyyar yin magana, sai ya fara tunanin ko maganar da zai yi tana cikin abin da ya dace da Allah da kuma saboda Allah. Idan ya ga haka ne, sai ya cire dutsen daga bakinsa sannan ya yi magana(3).

Wannan yana nuna irin yadda mutanen kirki na farko suka kasance suna taka-tsantsan wajen amfani da harshe.

Saboda haka, domin mutum ya kare kansa daga kura-kurai, zamewa cikin kuskure da kuma zunubai da dama da kan samo asali daga magana, ya kamata ya koyi yin shiru da kuma kame harshensa. Allah ne Mai ba da ikon yin hakan.

An kuma bayyana wannan ma’ana cikin baitin Mawlana Jalaluddin Rumi: “Shiru kamar teku ne, magana kuwa kamar rafi; Teku yana neman ka, kada ka rika neman rafi(4).”

Majiyoyi

1. Nahjul Balagha, Hikima ta 224.

2. Misbah al-Shari’a, juzu’i na 1, shafi na 101.

3. Misbah al-Shari’a, juzu’i na 1, shafi na 101.

4. Mawlana Jalaluddin Rumi, Masnavi, Daftar na huɗu.

An shirya wannan rubutu ne daga Sashen Ilimi da Al’adu na Kamfanin Dillancin Labaran Hauza.